Астанада өтетін күрес түрлерінен әлем чемпионатының қатысушыларын орналастыруға 11 қонақ үй әзірленеді
Астана күрестен әлем чемпионатын өткізуге дайындалып жатыр. Спортшылар мен делегация мүшелерін орналастыру үшін ұйымдастыру комитеті елордадағы 11 қонақ үйді белгіледі. Бұл туралы ОКҚ алаңында өткен баспасөз конференциясында ҚР туризм және спорт вице-министрі Серік Жарасбаев мәлімдеді.
Оның айтуынша, Әлем чемпионатын Астанада өткізу туралы шешім мамыр айында қабылданған. Күрес федерациясы елорда әкімдігімен бірлесіп, дайындық іс-шараларының жоспарын әзірлеп, ұйымдастыру комитетін бекітті.
«Өз кезегінде техникалық делегация келіп, спорт нысандарымыздың дайындығына және олардың әлеуетіне баға берді», – деді Серік Жарасбаев.
Ол Астананың ірі халықаралық спорттық іс-шараларды өткізу бойынша мол тәжірибесі бар екенін атап өтті.
«Қонақтарды қабылдау үшін ұйымдастыру комитеті барлық спортшы мен делегация мүшелерін елорданың 11 қонақ үйіне орналастыруды жоспарлап отыр. Астананың ірі спорттық іс-шараларды өткізу бойынша тәжірибесі жеткілікті. Сондықтан бұл жарысты да жоғары ұйымдастырушылық деңгейде өткізетінімізге сенімдімін», – деді спикер.
Қазір басты назар спорт нысандарын халықаралық талаптарға сай дайындауға, спортшылар мен көрермендерге қолайлы жағдай жасауға және жарыс өтетін алаңдардың толық әзірлігін қамтамасыз етуге бағытталған.
«Біздің басты мақсатымыз – Әлем чемпионатын жоғары деңгейде өткізіп, жарыстың барлық қатысушысына барынша қолайлы жағдай жасау», – деп атап өтті Серік Жарасбаев.
Сонымен қатар Әлем чемпионаты аясында UWW-дің есеп беру-сайлау конференциясы өтеді. Вице-министрдің айтуынша, бұл іс-шараны өткізуге де жоғары жауапкершілікпен дайындық жүргізілмек.
XAQ